Телеграма со честитки

Директорот на Комисијата за односи со верските заедници и религиозни групи (КОВЗРГ) г-дин Даријан Сотировски упати телеграма со честитки до Неговото превозвишенство, Бискупот скопски и Епарх струмичко-скопски монс. д-р Киро Стојанов по повод големиот јубилеј 25 години епископска служба. 

Ваше превозвишенство,

Силно се чувствува човечноста, добрите намери, но и верата, посветеноста и богопосветеноста кај еден човек. Сите сакаме таков пријател, родител, такво дете, таков учител, сосед, роднина, но секој си посакува и таков духовник.

Токму таков човек изминативе 25 години пастирски се грижи за верниот народ од католичка вероисповед во Македонија. Таквиот силен впечаток за Вас е препознаен од сите кои имале можност да соработуваат со Вас за различни прашања и во различни времиња.  

Навршувањето на 25 години од Вашата епископска служба кај мене буди искрена радост поради која срдечно Ви го честитам јубилејот и Ви ги истакнувам најдлабоките желби за крепко здравје и умножување на сите досегашни успеси во иднината.

Нека новите хоризонти пред нас не украсат со убави и среќни мигови на споделена радост!

Останувам со длабока почит,

                                                                       Директор

                                                                 м-р Даријан Сотировски