КОВЗРГ во соработка со МПЦ-ОА со панихида и полагање на цвеќе на гробното почивалиште пригодно ја одбележа 60 - годишнината од упокојувањето на првиот верски референт Вељо Т. Манчевски

На ден 21. 01. 2022 година во пресрет на 60 годишнината од упокојувањето на првиот верски референт и учесник во НОБ и АСНОМ, протојерејот Вељо Т. Манчевски (+ 23. 01. 1962) со почеток во 11:00 часот во Архиепископскиот соборен храм „Свети Климент Охридски“ во Скопје беше отслужена Панихида во негов спомен. Со чинот на Панихидата чиноначалствуваше Претстојателот на Македонската православна црква - Охридска архиепископија (МПЦ-ОА), Неговотото блаженство, Архиепископот охридски и македонски и на Јустинијана Прва г. г. Стефан во сослужение на повеќемина свештеници. За време на парастосот, Архиепископот г. г. Стефан одржа пригоден говор во кој го истакна значењето на ликот и делото на овој заслужен народен свештеник, кој со своето делување одиграл клучна улога  во борбата за обнова на Охридската архиепископија како Македонска православна црква.

На панихидата присуствуваше Директорот на Комисијата за односи со верските заедници и религиозни групи (КОВЗРГ), г-дин Даријан Сотировски со неговите соработници, членови на семејството, како и почитувачи на ликот и делото на овој заслужен и истакнат јавен и општествен деец. 

По панихидата државно-црковна делегација предводена од Директорот на КОВЗРГ, г-дин Даријан Сотировски положи цвеќе на вечното почивалиште на верскиот референт Вељо Манчевски на Градските гробишта во Бутел во знак на благодарност, помен и чест на неговите значајни дела за развојот на нашата држава положени во темелите на нејзиното современо конституирање и етаблирање, особено во обновата на верскиот живот и соживотот, како и во спречувањето на странски пропаганди и влијанија.